recent
أخبار ساخنة

كيفية التاكد من سلامة كارت الشاشة

الصفحة الرئيسية


كيفية التاكد من سلامة كارت الشاشة

 

إزاى أعمل تيست للكارت و أعرف إنه مش متعدن بيه ؟

و أعرف إزاى إنه مش مهلوك عموماً سواء في التعدين أو غيره ؟
مبدئياً كدا لازم نفهم إيه تأثير التعدين على الكارت
و إيه إللى بيحصل أصلاً أثناء التعدين ؟
التعدين بكل إختصار هو مهمة بتتعمل على كارت الشاشة
زي الجيمنج أو الرندر أو أي حاجة ممكن نستخدم فيها كارت الشاشة بتاعنا
بس المهمة دى بتبقى مستمرة لأيام و ممكن لشهور بدون فصل
يعنى مثلاً لو انا جيمر تقيل و بلعب 8 ساعات يومياً
هيبقى الكارت مستهلك ف ال 8 ساعات دول
بشكل أكبر من الوضع الخامل للجهاز
و مش هيبقى طول ال 8 ساعات مستهلك 100%
لكنه هيبقى متفاوت حسب الجيم نفسه و الجرافيك إللى بيتعرض ف لحظتها
و كذلك الرندر ، هيبقى وقت الرندر فقط أو عرض الجرافكس التقيل هو أكبر إستهلاك
غير كدا الإستهلاك هيقل و مش هيبقى ف ضغط كبير علي الكارت
و هيرتاح بعد ال 8 ساعات إستهلاك
لكن التعدين بيبقى تقريباً طوال الفترة إللى شغال فيها المهمة دى
24 ساعة – 7 أيام – 30 يوم
الكارت مستهلك بالكامل بدون أي تفاوت ف الجهد
و دا من أكبر أسباب إن الكروت إللى بيتعدن بيها فترات طويلة
درجة حرارتها بتعلى عن الطبيعي و بنلاحظ تراجع في أدائها العام
و عمرها الإفتراضي بيقل شوية عن الكارت الطبيعي
و معدل دوران المراوح بيبقى أبطأ
كل دا بيحصل أحياناً لكن مش دايماً .
التعدين مش واحد بيمسك الكارت و بيقعد يفحت بيه و لا بيخربه
زي ما وضحنا هي مهمة على الجهاز بتتعمل ببرامج معينة زي أي تاسك
وارد جداً يكون كارت إستخدام جيمنج أو جرافكس
يكون مهلوك بشكل أكبر من كارت مستخدم ف التعدين
دا راجع للشخص إللى كان بيستخدمه و مدى إهتمامه بيه
خصوصاً كمان إن الكروت إللى بيتعدن بيها لو حد فاهم و متخصص
بيبقى حاططها في تهوية كويسة أو تكييف
كمان بيبقى مقلل الباور إللى واصل للكارت عشان ميسخنش بسرعة 
و تسمع إستخدام جيمنج فـ تفرح و تروح تشتري
الموضوع مش كدا إطلاقاً ، ممكن يبقى كارت متعدن بيه
و حرارته و حالته أفضل من الكارت إللى مش متعدن بيه
بالمناسبة كمان فيه كروت إستيراد حالياً في السوق
يعني الإختيارات كتير قدامك ، و متتسرعش في أي حاجة
الموضوع معتمد بشكل كبير على أمانة الشخص إللى بتتعامل معاه
و لو هتشترى إستيراد لازم تعرف فرزه إيه ، و معاه ضمان و لا لأ ؟
لإن مش كل الإستيراد واحد !
و أهم حاجة طبعاً التيست إللى هتعمله و الخطوات الذهبية اللولبية
إللى هنقولهالك و من خلالها تبقى في الأمان
إزاى تفحص الكارت و إيه وسائل الحماية الكافية ليك ؟
1 – برنامج Furmark إللى ف رأيى ملوش قيمة حقيقية تأكدلى شئ
بس أهو إختبار هنبدأ بيه و مفيش منه ضرر كبير يعنى
من خلاله هنعمل stress test
و هنشوف هل الجهاز هيفصل أو هيهنج أو هيحصل أي مشكلة أثناء التيست
ممكن نعمل تيست أوتوماتيك بينتهي بوقت معين و يظهرلنا بنشمارك
و ممكن نعمل تيست مفتوح ينتهي وقت ما نقفله إحنا يدوياً
إعمل إللى عاوز لمدة دقيقتين ل 5دقايق و شوف الحرارة و النتيجة الإجمالية
أحياناً الكارت بيبقى سليم و ممكن البرنامج يرستر أو يهنج
بس دا بيحصل مرة واحدة فقط و نادراً
ف متتخضش لو حصل معاك و جرب تاني
كمان البرنامج مش مقياس مطلق ع أي شئ و وارد يفوت عيوب كتير
بس إعمله و مش هتخسر ، و جرب إللي جاي هو الأهم
2 – برنامج 3dmark المحترم جداً
دا التيست بتاعه مختلف شوية و بيعتمد ع حاجة شبيهة بالرندر
مهم جداً برضو ، و هنعمله و نسيبه يخلص براحته كل المراحل
و بعتبره من أهم الخطوات الحاسمة
3 – نجرب أحدث تعريف مستقر للكارت ، و نسطبه و نشغل أي لعبة تقيلة
و نتابع فيها الأداء العام للكارت و الحرارة
4 – نبص لشكل الكارت الخارجي و نشوف هل مفتوح قبل كدا
و لا المسامير بقفلة مصنعها و متفتحتش خالص
كمان هنبص لشكل البوردة سليمة و لا فيها أي حاجة شكلها مش طبيعى ؟
و هنبص على المراوح و نشوف الهيكل الخارجي للكارت كله
هل فيه كسور في المروحة أو حاجة مش مظبوطة
من الأخر الهيئة العامة للكارت مظبوطة و لا فيها شيء غلط
كمان هل الكارت براند معروف و لا نسخة مضروبة
دا كله بنلاحظه من شكل الكارت الخارجي
5 – الكارت له بنشمارك على الموقع الرسمي و مراجعات على اليوتيوب
هنشوف معدل الحرارة و الأداء و الفريمات و ناخد متوسطه
لإن مش كل البنشمارك واحد
و هنقيسه على إللى هيظهرلنا من الكارت بتاعنا
هل متوسط حرارة الكارت في الضغط مثلاً 60 و كارتنا جايب 90 !!!
هل بيجيب على مواصفات معينة في لعبة 70 فريم
و جايب معانا على نفس المواصفات 50 فريم فقط
و هنبص و نقارن في أكتر من حاجة
مع مراعاة التوافق و التناسق في المواصفات
و نشوف هل الأداء و الحرارة طبيعيين و ماشيين مع المتوسط و لا لأ
6 - نفتح برنامج gpu z ، و نشوف قرايات الكارت
سواء البيوس و إصداره ، و ترددات الميموري و الكلوك
لإن ف كروت بتبقى معمولها بيوس غريب و بيظهر fake
او معمولها فلاش أو تحويل لـ كروت تانية
و كروت متخفض الترددات بتاعتها و أقل من الطبيعي
و الألاعيب كتير أوي
و دا بيكون عشان الكارت مهلوك بزيادة ، و التاجر بيحاول يداري دا
أو لغرض النصب ع المستخدم و بيع كارت 570 ع إنه 580 مثلاً
7 – زى ما وضحت فوق إن البائع يكون حد موثوق ، و لو تاجر منعرفوش
و ملوش صفحة ، أو حتى يوزر عادي ، يبقى بعد ما نعمل كل الخطوات دي
ناخد منه ضمان شخصي ، و دي متفاوتة من شخص للتاني
الطبيعي إن الضمان يبقى يوم واحد بعد التيست
لكن فيه ناس بتدى أسبوع ، و ناس بتدي شهر و إتنين
و كل واحد حسب راحته ، و حسب الاتفاق
لكن أقل شيء يوم واحد 24 ساعة ، لعدم الضرر بالبائع أو المشتري
وارد جداً لو فيه مشكلة معينة متظهرش معاك
حتى لو عديت كل التيست دا بشكل سليم !
وارد متظهرش حتى بعد الضمان سواء ال 24 ساعة أو حتى الشهر
وارد الكارت يبوظ لوحده بعد ما كان شغال بمنتهى الكفائة
و حتى لو شاريه جديد
وارد الكارت تكون حرارته كويسة و شكله العام كويس
و يحصل فيه مشكلة سواء إتعدن بيه أو لأ
لا التعدين مقياسة الحرارة العالية
و لا الحرارة الطبيعية مقياس مطلق إن الكارت كويس
و بعدين يا عم الشهاب المجنون ، منشتريش يعني و لا إيه
تعا بس أقولك ، دي خطوات للأمان مش للضمان المطلق مدى الحياة
الإنسان بياخد العلاج و ممكن برضو يمرض عادي
لكن بالمنطق فى أغلب الأحوال
الدنيا بتمشى كويس جداً و مبيحصلش مشاكل
و ضرورى جداً نتبع الخطوات دي قبل الشراء
بالنسبة لمؤشرات الحرارة الطبيعية في الكروت و إنفيديا بالأخص
إنها متزيدش عن 75 مثلا كحد أقصى في أعلى ضغط و حرارة
و إنها توصل ل 80 لو كارت بيستهلك كهرباء بشكل كبير
و معروف عنه كدا ، زى كروت / أر إكس ، مثلاً
و ممكن نوصل 80 ع بعض الكروت من الشركتين ف ظروف معينة
لكن المفروض في الطبيعي و الأجواء المعتدلة و تحت الضغط العادي
إن الكارت إللى تبريده محترم أياً كانت شركته ، ميزيدش عن 75 درجة
في أقصى ضغط إن مكنش أقل
الكلام ع الكروت الجديدة إللي إنت أول حد تستخدمها
طبيعي زيادة 5 درجات كمتوسط لو الكارت مستعمل

 عشان كدا متسمعش كلمة إستخدام تعدين فـ تخاف و تهرب


التعدين فى حد ذاته مفيش حاجة بتعرفه
لإن ببساطة دا سوفت وير بيشتغل على الكارت زي الجيمز و الجرافكس
هل فيه برنامج يقولك الكارت دا شغل ألعاب قبل كدا مثلاً و لا لأ !
و مش بيتعرف إلا لو أثر بالسلب على الكارت و بقى مهلوك
وقتها بنعمل الخطوات إللى قلناها فوق
و بنكتشف من خلالها إنه مهلوك مثلاً و منشتريهوش !
و برضو مش بنبقى قادرين نجزم هل دي هلكة رندر و لا جيمنج و لا تعدين ؟
و لا صاحبه رزعه فى الحيطة مثلاً و إتهلك بسبب الإهمال و العنف المفرط

google-playkhamsatmostaqltradent